Air Flow Meter adjustment

Volume Air Flow

Air Flow Meter

الشبح المخيف

الاول لازم نعرف ايه هو واعراض تلفه

٢-نعرف ازاي نصلحه

٣-ازاي نختبره

٤-نعايره

بسم الله الرحمن الرحيم نبدا

اولا الحساس ده هو عباره عن حساسين

الحساس الاول عباره عن قياس حجم الهواء الداخل الى الموتور وهو يعتبر كميه تدفق الهواء الداخل للموتور وده موضعنا النهارده AFM

الحساس الثاني هو درجه حراره الهواء الداخل الى الموتور IAS وده دايما ما بيبقاش فيه مشكله

....................

اعراض تلفه

نسبه استهلاك بنزين عاليه،حريق غير مكتمل،عدم انتظام في السلانسيه ، ارتفاع وانخفاض Rpm بشكل سريع وملحوظ " نهجان في وضع الثبات" ، ثقل في استجابة البنزين علي السرعات

..........

كيفيه قياسه..... من اول هنا نركز كويس جدا

اولا

هنفك من مكانه من العربيه ونطلعه بره ونجيب افوميتر ونقيس من الفيشه بتاعته علما بان فيشة بتاعته عليها ارقام ١,٢,٣,٤ زي الصورة الموضحة

والبوابة مقفولة تماما

رقم ٢,٣ يساوي 610اوم

رقم 2,4 يساوي 60 اوم

والبوابة مفتوحة تماما ...وده حضرتك هتفتحها بصباعك

رقم 2,3 يساوي 280 اوم

رقم 2,4 يساوي 780 اوم

لو طلع كل القيم دي يبقى الحساس تمام

طيب لو مطلعش القيم ديه اكتب القيم اللي طلعت في ورقة ومستعجلش لسة الموضوع معنا مطول شوية

،،،،،،،،،،،،،،،،،،،

ثانيا

حط الحساس على جنب ونرجع بقى للعربيه وعشان نقيس الفيشه بتاعت الضفيرة وبرده فيشه الضفيره عليها ارقام

1 .....رقم 4 المفروض ارضي يعني نجيب الافوميتر على وضع الفولت ونقيس رقم 4 مع موجب عمومي البطاريه المفروض 12 فولت

2 .... هنفتح كونتاكت ونقيس رقم 3,4 المفروض يساوي 5فولت

لو طلع القياس ده صح يبقي الفيشة تمام

.........................

ثالثا

نرجع بقي نوصل الحساس وندور العربية ونقيس فولت علي الفيشة وهي راكبه في الحساس في الحالات ديه

بين رقم 2,4 علي السلانسه المفروض 0.9فولت

بين رقم 2,4 علي 2000rpm المفروض 1.5فولت

بين رقم 2,4 علي 4000RPM المفروض 2.2فولت

لو طلع القياس ده صح يبقى الحساس كويس ولو طلع قيم مقاربه يبقي محتاج يتظبط حاجات صغيرة

.................

رابعا

يلا بقي نظبط الحساس طبعا هو برة العربية في ايدك

حضرتك بمفتاح الانكيه ونلف براحة الي ان نقفل البوابه بتاعت بحيث ان مجرد انها توصل للاخر نسيب الانكيه طيب اذا لقناها اصلا قافلة نسبها بس خلي بالك عشان مش تكون قافلة زيادة عن اللزوم ....احنا عايزنها قافله اه لكن بمجرد ان الهواء يمر عليها يفتحها بتبقاش تقيله

...................

خامسا

نفك الغطاء الاسود ونحرك الترس الاسود الكبير لغاية لما الريشة تيجي علي اول مسار البوردة وتقريبا هتحرك حولي 5: 8 سنون بس، غير كدة يبقي الريشه مرحلة اوي وغالبا الحساس فقد الظبط وباظ.....ولو لقينا الريشة علي الاول يبقي تمام نسبها متنساش قبل ما تحرك تاخد علام علي الترس بماركر قلم يعني

.............

سادسا

نعايره بقي

هنجيب ثقل 100 جرام وثقل تاني 150 جرام وتوزنه علي ميزان حساس بعن الناس بيستخدمو لقمة مفتاح

المهم والحساس في ايدك حط الثقل ال 100جرام علي البوابة وهي مقفولة المفروض متنزلش ولا تفتح لو فتحت رجلش بالانكيه وعيد خطوه ظبط الريشة

شيل الثقل ال100 وحط 150 المفروض البوابه هتفتح بمقدار 28 مم بظبط وهتقيس المسافة ديه ببكليز

ملحوظة

لو ظبطت اي رجلاش او ترس الريشة هتعيد تاني المعايرة وهتقيس قيمة الاوم علي اطراف الحساس وبعدين تقيس قيمة الفولت علي فيشة الحساس وهي راكبة والعربية دايرة

يعني هتعيد الخطوات اولا وثالثا

الخطوات ديه جت عن كميه قراءة ومراجعة ودراسة الحساسات ديه وتجربة لعربيات كتير اوبل وجولف وبي ام

وواجوبه من بوش المانيا والوايرنج بتاع الحساس وعن بحث وتعب فوق الوصف

ياريت دعوة حلوة منكم